行恩尼斯達舊路　桑馬達加盟神戶勝利船

西班牙中場桑馬達今夏離開土耳其勁旅加拉塔沙雷之後，一直未有班落，根據「轉會權威」記者羅曼諾(Fabrizio Romano)早前爆料，呢位35歲老將有可能行同胞恩尼斯達舊路加盟神戶勝利船，而呢支日職勁旅於周日（3日）正式宣布桑馬達來投。

桑馬達上年夏天離開曼聯，同加拉塔沙雷簽約1年，上季上陣18場入3球及2次助攻，表現一般，呢支土耳其勁旅放棄同佢續約。據悉中東及日職球隊都有意簽入桑馬達，羅曼諾指呢位名將傾向去日職搵食，最大機會加盟神戶勝利船，勝利船果然出手，成功將桑馬達收歸旗下，將會穿上64號波衫。

另一位西班牙中場恩尼斯達曾經效力神戶勝利船5年，直至今年7月踢到39歲先至離隊，桑馬達可能都想學呢位同胞延續較長球員生涯，所以傾向加盟神戶勝利船。