18年後童話式回歸　沙治奧拉莫斯將投西維爾

西班牙37歲中堅沙治奧拉莫斯，今夏約滿巴黎聖日耳門(PSG)後一直未有班落，正當有傳佢將簽約伊蒂哈德，西甲勁旅西維爾突然出手，沙治奧拉莫斯為實重返母會願望，已即刻答應減薪加盟，相隔18年後再次為西維爾披甲。

沙治奧拉莫斯遲遲未落班，據報就係希望重返西維爾，不過呢支西甲球會一直否決，當沙治奧拉莫斯準備接納伊蒂哈德聘約，西維爾突然轉軚，喺教練文迪列巴堅持下向沙治奧拉莫斯開出短期合約，並且順利達成協議。

西班牙傳媒指，沙治奧拉莫斯寧願減薪加盟西維爾，都唔去沙特掘金，最大原因係佢屋企人都喺安達盧西亞，而返西維爾掛靴亦係沙治奧拉莫斯最大心願。沙治奧拉莫斯係西維爾青訓出身，2005年轉投皇家馬德里登上事業高峰，上2季喺PSG傷多過踢，今夏終於如願重返西維爾。