曼聯上仗英超對阿仙奴，踢到74分鐘出現疑似內訌一幕，中場卡斯米路凶神惡煞，揪住首次上陣嘅賀蘭特衣領，講咗幾句，當時網民以為呢位巴西國腳不滿對方表現，事後賀蘭特出來澄清，指卡斯米路其實係講咗激勵說話，為佢打氣。
賀蘭特接受傳媒訪問時解釋當時情況：「卡斯米路用西班牙話講咗類似加油嘅字句，佢好高興我可以為球隊帶來一種有別於馬迪爾嘅風格，可能馬迪爾技術好過我，擅於搵空位，我比較喜同對手直接硬碰，卡斯米路以前冇睇我過踢波，所以佢話對於我嘅踢法，感到好驚訝。」呢位20歲丹麥國腳仲話曾經好多球會對佢有興趣，但佢首選始終係曼聯。
賀蘭特有份入選丹麥國家隊，將於周五(8日)凌晨歐國盃外圍賽主場對聖馬力諾，3日之後對芬蘭。