菲爾鍾斯現身曼聯訓練場　閃電回歸？

國際賽期間曼聯大部份球員都返國家隊報到，不過近日青年軍操練，竟然見到夏天約滿離隊嘅菲爾鍾斯現身，有傳佢可能閃電回歸擔任青年軍教練，但消息指曼聯目前未考慮向佢開出長期合約，只係畀佢喺青年軍學習教練工作。

31歲嘅菲爾鍾斯效力曼聯長達12年，今個夏天約滿後，目前仍然未有落班，佢最近就返曼聯協助U18青年軍練習，不過據《曼徹斯特晚報》報道，畀前球員返嚟青年軍幫手係慣常做法，亦令年輕球員有機會跟球星學嘢，曼聯暫時未有計劃正式聘用菲爾鍾斯。

事實上，報道指菲爾鍾斯仍未決定下一步點做，繼續比賽或者提早掛靴轉做教練。消息指效力曼聯12年嘅菲爾鍾斯，原本有資格要曼聯舉行紀念賽，不過佢就否決呢個計劃，甚至自嘲話：「除咗我阿爸同阿媽，仲有邊個會嚟(紀念賽)？」