C朗認輸？我同美斯競爭已結束

葡萄牙隊長C朗拿度出席歐國外對斯洛伐克記者會，公開談論佢同美斯多年嘅競爭，C朗表示，同美斯嘅競爭已經結束，雖然彼此未有成為朋友，但互相尊重，鍾意C朗嘅球迷，冇必要討厭美斯。

卡塔爾世盃後，C朗同美斯都先後離開歐洲主流聯賽，C朗轉戰沙特，美斯空降美職，C朗坦言兩人嘅競爭已告一段落：「憎恨美斯？我唔認為係咁，我哋之間嘅競爭已經結束，曾經係良性競爭，球迷都好喜歡。其實鍾意C朗嘅人冇必要討厭美斯，兩個都咁出色，一齊改寫歷史，亦繼續改變。」

C朗認為兩人之間最重要係互相尊重：「我哋都受到全世界尊重，佢走佢嘅路，我走我嘅路，大家都咁出色，我覺得競爭唔係對立關係，我同佢同場競技15年，最後成為咗，我唔係話朋友，我哋互相尊重。」

對於C朗言論，廣大網民其實心中雪亮，因為自從美斯去年捧走世界盃後，已經自動成為最佳，兩人之間嘅競爭已經分出勝負。