踢走馬古尼！英格蘭中堅「迪薩比製造」

英格蘭喺歐國外對烏克蘭，防線有機會出現新景象，由於史東斯受傷、哈利馬古尼喺曼聯亦長居後備，領隊修夫基正考慮係咪試用新組合，上季白禮頓嘅中堅李維士鄧克同高維爾，有望喺英格蘭再度合作，而修夫基最要多謝嘅人係白禮頓領隊迪薩比！

據英國《每日郵報》報道，馬克古希、李維士鄧克同高維爾都有機會喺今輪國際賽上陣，其中車路士中堅高維爾嘅冒起，更加係修夫基嘅喜訊，英格蘭向來缺少左腳嘅用波型中堅，20歲嘅高維爾就被視為未來支柱。高維爾上季由車路士外借白禮頓，喺意大利名帥迪薩比教導下大為成熟，同李維士鄧克合作無間，有望成為英格蘭中堅組合。

高維爾表示：「足球戰術改變咗好多，我鍾意喺後場展開攻勢，史東斯就係模範，上季跟迪薩比踢波令我對自己技術更有自信。」貴為白禮頓防線核心，李維士鄧克同樣將自己嘅進化歸功迪薩比：「自從迪薩比上任，我對足球有全新嘅體會，樸達之前已經踢悅目足球，但迪薩比對細節嘅執著係無人能及，我覺得自己依家先真正認識足球。」