意大利新帥首戰出事　遭北馬其頓逼和

周日(10日)凌晨歐國盃外圍賽C組，上屆冠軍意大利由新領隊史巴列堤首次領軍比賽，出師不利，作客被北馬其頓逼和1比1，導致出線形勢陷入危機，下仗周三(13日)凌晨主場對烏克蘭，變成生死戰。

賽前意大利收到不利消息，2位進攻主力費達歷高基艾沙、羅倫素柏歷堅尼受傷退隊，史巴列堤沿用協助拿玻里捧上季意甲冠軍嘅433陣式，包括用2位拉素球員恩莫比利、薩卡尼，以及拿玻里翼鋒保列坦奴組成鋒線。

原本一切順利，並於下半場2分鐘，由恩莫比利射入打開紀錄，但意大利並未佔有明顯優勢，為失分埋下伏線，戰至81分鐘，北馬其頓中場伊尼斯巴迪希喺禁區頂主射罰球入網扳平1比1。

賽後史巴列堤表示，球隊防守欠穩，特別係失去中場截擊力，透露下仗將會變陣迎戰烏克蘭。意大利現時3戰只有1勝1和1負，落後第2位烏克蘭3分，但踢少1場，球隊能否取得出線資格，下仗勝負非常關鍵。