克羅地亞主帥力撐　波索域踢沙特冇問題

克羅地亞日前喺歐國外5比0大炒拉脫維亞，莫迪歷、比列錫、波索域等老臣子繼續擔正，雖然唔少球迷對波索域選擇去沙特阿拉伯落班表示懷疑，不過克羅地亞領隊達歷就力撐愛將，表示沙特足球水平提升唔少，國家隊位置唔需要擔憂。

波索域今個夏天由國際米蘭轉投艾納斯，有球迷擔心佢嘅競技水平難以維持，不過領隊達歷表示：「好多人都輕視沙特聯賽嘅水平同質素，我10年前都喺沙特教波，或者當時係會有問題，但依家所有人都重視沙特聯賽，佢哋有C朗、賓施馬等巨星，波索域已經踢咗5、6場精彩賽事，表現更勝喺意甲，佢落場一定會付出所有，我完全唔擔心佢。」

事實上，達歷本身對沙特聯賽認識深厚，喺佢接任克羅地亞主帥前，曾經喺沙特執教長達7年，教過希拉爾、艾阿恩等勁旅，2016年甚至率領艾阿恩殺入亞冠盃決賽。