利物浦好消息　干拿迪復操爭取出戰狼隊

利物浦中堅華基爾雲迪積克因為被加刑，需要停賽多1場，無緣9月16日晚英超利物浦作客狼隊，幸好紅軍迎來好消息，養傷近1個月嘅中堅伊巴希馬干拿迪已經復操，可望填補雲迪積克嘅位置，爭取出戰狼隊。

伊巴希馬干拿迪自從8月中對般尼茅夫之後，一直因傷缺陣，呢位24歲法國國腳近日喺社交網分享自己跑步訓練片段，證明傷勢已經冇問題。由於華基爾雲迪積克停賽，利物浦上仗對阿士東維拉，焗用多數踢右閘嘅祖高美斯出任中堅，表現並唔可靠，如果伊巴希馬干拿迪可以復出對狼隊，對於利物浦而言，絕對係一場及時雨。