里昂炒教練白蘭斯　加度素成新帥大熱

法甲球隊里昂正式宣布同教練白蘭斯解約，結束雙方唔夠1年嘅賓主關係，由於前車路士主帥樸達已經拒絕里昂邀請，法國媒體《Footmercato》指意大利「硬漢」加度素好大機會成為里昂新主帥。

現年57歲嘅白蘭斯球員生涯捧過英超、世界盃及歐國盃冠軍，轉為教練之後，亦曾率領波爾多及巴黎聖日耳門贏得法甲等多項錦標。呢位法國名帥上年10月臨危授命執教里昂，獲得上季聯賽第7位，今季成績急轉直下，踢4場聯賽僅1和3負排榜尾，會方決定「斬纜」同佢解約。

里昂原本有意搵樸達接替白蘭斯，但呢位48歲英格蘭少帥拒絕去收拾爛攤子，加度素成為新帥熱門，呢位45歲意大利名宿曾經執教AC米蘭、拿玻里、華倫西亞等球隊，但成績欠佳，今年1月被華倫西亞炒魷之後，一直未有教職，可以即時上任。不過，以加度素過往履歷，恐怕未必拯救到里昂。