曼聯折雙翼　柏利斯查機會來了

曼聯2位翼鋒查頓辛祖、安東尼馬菲奧斯分別因為「頂撞主帥」、「家暴」被打入冷宮後，恐怕短期內難以上陣，右翼位置出現真空，令今夏幾乎被外借去出嘅法根度柏利斯查突然有上位機會，呢位21歲烏拉圭小將可能成為紅魔鬼救星。

由於拉舒福特、加拿祖踢慣左翼，加上以往可以任右翼嘅艾蘭加、格連活特已經離隊，除非安排般奴費南迪斯踢右路，否則法根度柏利斯查成為右翼唯一選擇。呢位新星3年前由彭拿路加盟曼聯之後，大部份時間被外借去西甲球隊艾拉維斯，上月亦幾乎再次被外借，但佢最終決定留隊，認為自己有能力爭取上陣機會。

事實上，法根度柏利斯查喺季前熱身賽有唔錯表現，對畢爾包一役更射入1球，佢喺上月英超對狼隊及熱刺，都有後備上陣，並有份為烏拉圭出戰日前世界盃外圍賽對厄瓜多爾，狀態不俗。

同埋法根度柏利斯查屬於傳統右腳右翼球員，有別於安東尼馬菲爾奧斯往往要扣入中路，同左腳射門，如果柏利斯查擔正，或者可以為曼聯帶來新踢法。