熱刺神奇反勝　普斯迪高路連續50仗主場不敗

今季全面翻生嘅熱刺，周六(16日)英超喺第98分鐘同100分鐘連入2球，主場神奇反勝錫菲聯2比1，開季5戰得13分，創下熱刺英超史上最佳開季成績，新帥普斯迪高路亦橫跨3間球會，錄得連續50場聯賽主場不敗走勢，熱刺似乎搵啱人！

熱刺今場由孫興民掛帥，大部份時間圍攻錫菲聯，但客隊喺73分鐘先開紀錄。熱刺尾段換入有「心理問題」嘅李察利臣等攻擊球員狂攻，果然喺補時8分鐘由李察利臣接應角球頂入追平，2分鐘後再由古路施夫斯基禁區內抽入，絕地反勝2比1。

熱刺開季5戰4勝1和，係球會英超史上最佳開季成績，當中2仗主場贏晒，係澳洲領隊普斯迪高路連續第50場聯賽不敗，走勢橫跨橫濱水手(10場)、些路迪(38場)同熱刺(2場)，普斯迪高路表示：「我作客一樣想贏波，不過球迷入到球場支持球隊，我哋好想用勝利回饋佢哋，好幸運我之前2間球會，都有好浩大嘅主場聲勢，呢一點好有幫助。」