祖奧菲歷斯翻生　巴塞5比0大炒貝迪斯

周日(17日)凌晨西甲賽事，巴塞隆拿主場清風送爽5比0大破貝迪斯，兩名新加盟嘅葡萄牙球星祖奧菲歷斯同祖奧簡些路，齊齊拎到轉會後第1個入波，其中祖奧菲歷斯嘅翻生演出，更獲教練沙維高度讚揚。

祖奧菲歷斯由馬體會加盟後，今場首次正選上陣，25分鐘就為巴塞先開紀錄，7分鐘後羅拔利雲度夫斯基射成2比0，下半場費倫托利斯、拉芬夏比洛尼同祖奧簡斯路各入1球，協助巴塞隆拿大勝5比0。祖奧菲歷斯今場表現生猛，27次傳球有26次成功，亦有2次成功過人。

巴塞教練沙維賽後表示：「祖奧菲歷斯同祖奧簡些路都嚟到佢哋想效力嘅球隊，佢哋嘅個人能力提升球隊水平，祖奧菲歷斯嘅盤帶、突破為球隊作出重大貢獻。」祖奧菲歷斯亦滿意自己演出：「好開心可以再做正選，我一直知道效力巴塞隆拿會令我好容易表現自己，我嘅預感好準！」