般奴費南迪斯改踢中堅　球迷：偉大戰術！

曼聯近期陣容不整，考起埋「戰術大師」坦哈格，周六(16日)英超主場輸畀白禮頓一役，比賽尾段球迷見證震撼一幕，進攻中場般奴費南迪斯竟然以右中堅身份完成比賽。繼哈利馬古尼上季歐霸盃客串前鋒後，坦哈格又一令球迷O嘴嘅神調動！

曼聯今仗用鑽石型中場，般奴費南迪斯大部份時間都出任雙箭頭身後嘅「10號」，不過尾段為收復失地，一口氣換入加拿祖、法根度柏利斯查同雲比沙卡，改踢3-4-3陣式，而般奴費南迪斯就成為3人防線嘅右中堅，希望用佢嘅運球能力喺後場幫手組織，結果當然係冇乜效用。

唔少球迷見到呢幕都覺得難以置信：「呢一世都想像唔到般奴踢中堅」、「佢唔係曼聯最有創造力球員咩？點解會喺中堅？」、「偉大嘅戰術調動」、「蘭歷克都有好多瘋狂戰術，但肯定唔及坦哈格」。曼聯上季歐霸分組賽對皇家蘇斯，曾經換入哈利馬古尼同C朗合組雙箭頭，估唔到有般奴費南迪斯踢中堅呢招秘密武器。