【官宣】爭贏加度素　格羅素成里昂新帥

法甲球會里昂正式宣布，聘請格羅素擔任教練，接替早前被炒嘅白蘭斯，呢位45歲意大利名宿曾於球員時代效力過里昂，對球隊有一定認識，成為擊敗另一位候選教練加度素嘅主因。

格羅素最威水時期莫過於2006年世界盃4強加時射入德國大門，協助意大利晉級決賽，並於決賽互射12碼階段，主射最後一輪入波，成為捧盃功臣。不過，格羅素教波生涯發展麻麻，只係教過維羅納、布雷西亞、錫永等弱隊，上季協助費辛隆尼獲得意乙冠軍，取得意甲席位，卻不獲續約。

里昂早前解僱白蘭斯後，曾經有意搵加度素接手，但最終由格羅素勝出，據悉雙方簽約至2025年6月，佢將於9月24日凌晨首次領軍作客比斯特。里昂周一(18日)凌晨主場對勒哈弗爾，預料格羅素應該會入場觀戰。