謝利美杜古爆發　踢走基亞利殊？

曼城喺英超開季氣勢如虹，聯賽5連勝延續「3冠王」霸氣，其中新加盟嘅比利時翼鋒謝利美杜古，上場聯賽對韋斯咸光芒四射，連領隊哥迪奧拿都承認「估佢唔到」，有傳呢位21歲翼鋒，甚至有機會踢走基亞利殊，成為曼城左翼正選。

謝利美杜古以速度同單對單過人見稱，喺哥迪奧拿口中，佢係曼城少數嘅「正宗翼鋒」。呢位比利時新星已連續2場正選，首仗對富咸踢右翼，上仗作客韋斯咸就代替受傷嘅基亞利殊踢左翼，入波之餘全場威脅力強，呢場波佢有8次成功過人，比基亞利殊上季任何一場都多。雖然謝利美杜古同基亞利殊踢法完全唔同，但消息指哥迪奧拿希望有一位突破力強翼鋒，作為破密集防守嘅關鍵棋子，所以唔排除基亞利殊會改踢中路位置。

哥迪奧拿表示，謝利美杜古嘅爆發連佢都覺得驚奇：「當球隊買一個年輕球員，簽約4年、5年，我哋就要有耐性去畀佢進步同成長，不過謝利美杜古喺加盟第2場就踢出呢個水平，完全超出我嘅預期，我印象中真係未遇過咁嘅情況。」哥迪奧拿對佢讚不絕口，謝利美杜古上位應該唔使等好耐。