般尼被森林逼和　英超3支升班隊仲未開齋

周二(19日)凌晨英超獨腳戲，般尼作客被諾定咸森林逼和1比1，拎到重返英超後第1分，但仍然排喺聯賽榜尾二。連埋包尾嘅盧頓同尾4嘅錫菲聯，今季英超3支升班球隊仍然未贏過波，般尼領隊高柏尼就指球隊開始上力，有信心可以盡早開齋。

般尼今場表現唔差，作客情況下控球甚至稍佔上風，41分鐘岩度尼射入領先1比0；森林喺劣勢之下，61分鐘憑赫臣奧杜爾禁區頂轟入世界波追平。般尼尾段有利尼科士打入波被判詐胡，呢位前鋒補時階段仲開肘打人被罰紅牌，最終兩隊1比1握手言和。

雖然升班後仍未贏過波，不過領隊高柏尼就滿意球隊表現：「喺英超拎每1分都好困難，但經過4場後，我見到球隊有能力競爭，今場視乎你企喺邊面，我覺得般尼值得贏波，如果球隊繼續進步，成績一定有好大改善，我見到般尼有好大進步空間，呢個係最令人興奮嘅地方。」