傳奧斯爾做土耳其經理　同勒夫拍住上

德國一代球星奧斯爾今年3月宣布掛靴後，據報將會極速回歸球壇。德國《圖片報》消息，34歲嗁奧斯爾將會加入土耳其國家隊，出任總經理一職，而土耳其足總更準備請前德國領隊勒夫執教。

土耳其喺歐國外成績唔差，目前排小組第2位，而且已鎖定附加賽資格，不過早前熱身賽2比4慘敗日本腳下，據報領隊根斯同經理咸美艾天托普將被炒魷。據《圖片報》報道，土耳其足總已聯絡奧斯爾接任國家隊經理一職，而勒夫就好大機會接任成為新領隊。

奧斯爾嘅德國國家隊生涯幾乎都係跟住勒夫，呢位中場球星係土耳其裔，同土耳其總統埃爾多安關係密切而引起唔少爭議。奧斯爾2年前由阿仙奴轉會費倫巴治，但因紀律問題被球會雪藏，上年改投另一土超球會巴沙克舒希，又因長期受傷患困擾，今年3月宣布掛靴。