卡尼向曼聯證身價　籲隊友小心「受傷老虎」

曼聯重返歐聯第1擊就要作客拜仁慕尼黑，今場主角非哈利卡尼莫屬，呢位英格蘭前鋒原本係曼聯夏天頭號獵物，但因為唔想畀1億鎊(約10億港元)轉會費而擱置，令哈利卡尼最終加盟拜仁慕尼黑。哈利卡尼今場要向曼聯證明1億鎊係「物有所值」，賽前更呼籲隊友打醒精神，唔好畀曼聯呢隻「受傷老虎」有機可乘。

曼聯名宿里奧費迪南賽前表示：「拜仁對曼聯本來就係殿堂級對決，加上哈利卡尼嘅背境，令人更加期待，相信好多曼聯球迷，都好希望佢着嘅係曼聯波衫。哈利卡尼踢過歐聯決賽，但從未贏過冠軍，相信佢今場會更有動力去證明自己，曼聯絕對唔可以掉以輕心。」

哈利卡尼轉會拜仁慕尼黑後迅速融入，開季4場聯賽入4球，同近況差勁嘅曼聯係兩個世界，不過哈利卡尼賽前表示：「我知道曼聯依家經歷困難時刻，但有時呢啲球隊先係最危險，因為佢哋會有好大決心去反彈，我哋一定要好好準備，而且主場球迷要盡力聲援球隊。」