皇馬考察久保建英　可以半價簽回巢

日本國腳久保建英喺西甲發展多年，上季喺皇家蘇斯達開始擔大旗，今季更加有星級表現，5場聯賽已有3入波同1助攻。據西班牙《馬卡報》報道，皇家馬德里一直考察呢位日本小將嘅成長，而且擁有佢下次轉會50%嘅收益分享權，意味皇馬可以用半價3,000萬歐元(約2.5億港元)將佢帶返馬德里。

皇馬喺2019年簽入久保建英，但先後將佢外借去馬略卡、維拉利爾同基達菲，上年以3,300萬歐元(約2.75億港元)賣畀皇家蘇斯達，但合約列明佢下次轉會，皇馬可以分享50%收入。《馬卡報》消息指，皇馬對久保建英一直進行考察，如果佢繼續進步，皇馬唔排除會運用條款簽佢返嚟，就好似今夏喺華歷簡奴簽青訓出身嘅法蘭加西亞回巢一樣。

報道指久保建英同皇蘇嘅合約內，有6,000萬歐元(約5億港元)買斷條款，而皇馬因為可以分享一半收入，代表佢哋只要畀3,000萬歐元，就可以簽番久保建英，相當抵玩！