蘭斯達爾正選動搖　車路士同拜仁準備出手

阿仙奴門將蘭斯達爾上場聯賽突然被貶後備，引嚟外畀唔少爭議，雖然領隊阿迪達表明會「輪住用」2位頂級門將，不過蘭斯達爾嘅前途已響起警號。據報車路士同拜仁慕尼黑都密切注意情況，準備動用6,000萬鎊(約6億港元)搶人。

25歲嘅蘭斯達爾2年前加盟阿仙奴後，迅即搶走賓特尼奴嘅正選位置，表現大獲好評，被睇好係英格蘭國家隊未來1號人選，但阿仙奴夏天簽入西班牙國腳大衞拉耶，上場聯賽首演亦有好表現，令人擔心蘭斯達爾將失去正選。

英國《每日郵報》報道，車路士視蘭斯達爾為門將最佳人選，今季簽入嘅羅拔山齊士能力一般，未能夠擔起大旗；德甲勁旅拜仁慕尼黑同樣想蘭斯達爾做紐亞接班人，如果蘭斯達爾喺阿仙奴長坐冷板，兩大豪門將出手搶人。

蘭斯達爾今個暑假先同阿仙奴續約至2026年，據報依家轉會費至少6,000萬鎊，而且阿迪達表明需要2個頂級門將輪換，會將龍門同場外其餘10個位置一樣咁看待，根據戰術同比賽部署而作出換人，相信要阿仙奴放人都唔容易。