首輪歐聯西意不敗　曼聯成英超陀衰家

今屆歐聯首輪分組賽結束，4大聯賽球隊之中，西甲及意甲合共9隊都力保不敗，至於號稱全世界最高水平聯賽英超，4隊取得2勝1和1負，曼聯成為唯一輸波英超代表，慘成陀衰家。

由於西維爾以上屆歐霸盃冠軍身份，取得今屆歐聯入場券，聯同西甲前4位，所以西甲有5隊參賽，巴塞隆拿最威水，首日以5比0大勝安特衛普，宿敵皇馬亦旗開得勝，至於馬德里體育會、皇家蘇斯達、西維爾同樣領先之下，被對手逼和1比1，未能贏波的確比較唔抵。

意甲球隊方面，4隊只有拿玻里贏波，國際米蘭、AC米蘭、拉素都打和。至於英超兵團，上屆歐聯冠軍曼城，輕取貝爾格萊德紅星，阿仙奴相隔6年重返歐聯，大炒燕豪芬4蛋，表現更加搶鏡，相隔20年再戰歐聯嘅紐卡素打和上屆4強份子AC米蘭，已經有交代，曼聯力戰之下，以3比4輸畀拜仁慕尼黑，其實已經比預期好。

德甲4隊取得2勝2負，拜仁慕尼黑、RB萊比錫贏波，至於多蒙特、柏林聯輸波。