美斯體力透支　踢37分鐘主動要求離場

周四(21日)朝早美職賽事，國際邁亞密有美斯復出掛帥，不過呢位阿根廷「球王」只係踢咗37分鐘就主動要求離場，教練馬天奴賽後指美斯虛耗過度，下場聯賽唔會上陣，1星期後嘅美聯盃決賽可唔可以上陣亦成為疑問。

美斯為阿根廷踢完世盃外後，上場作客阿特蘭大聯已經休息，點知今場復出踢37分鐘，就見佢主動要求被換，返到後備席亦顯得筋疲力盡，好在隊友夠爭氣，喺美斯離場後愈踢愈有，最終4比0大勝FC多倫多，繼續向季後賽邁進。

除美斯之外，西班牙球星佐迪艾巴喺35分鐘亦被換走，教練馬天奴賽後表示：「佢哋練波嗰陣好正常，所以覺得可以喺今仗上陣，佢哋應該唔係肌肉受傷，只不過係疲勞，下場對奧蘭多城(25日)佢哋一定唔會踢。」國際邁亞密下周四(28日)會喺美聯盃決賽對侯斯頓戴拿模，美斯趕唔趕得切上陣，會係球迷關注話題。