「辛祖2.0」誕生　夏維斯慘成「007」

阿仙奴相隔6年重返歐聯，第一場立即大勝燕豪芬4比0，演出近乎完美，但隊內仲有1人表現令人失望，就係今季新加盟中場球星夏維斯，呢位24歲德國國腳踢足全場，再次冇份創造入球，至今為兵工廠上陣7次，0入球及0助攻，慘成「007」。

夏維斯入「廠」以來，表現一直備受批評，上輪英超作客愛華頓，領隊阿迪達終於將佢放喺後備席，改用法比奧韋拉踢正選，最終贏1比0，打破過去3次作客葛迪遜公園球場都輸波嘅宿命。

不過今場歐聯，夏維斯又復任正選，幸好對手燕豪芬實力較弱，即使夏維斯冇建樹，亦無阻兵工廠贏波。值得一提，曼聯2年前簽入查頓辛祖，呢位翼鋒首7次上陣，因為0入球及0助攻，而被嘲諷為「007」，夏維斯依家成為「辛祖2.0」。