羅馬希望同摩連奴續約　寸王有三大條件

羅馬上仗意甲以7比0大勝安玻里，終於打開今季勝利之門，令教練摩連奴壓力大減，意大利傳媒更加指羅馬管理層希望今年12月同呢位葡萄牙名帥展開續約談判。

據悉羅馬方面一直渴望同摩連奴續約，「寸王」亦有意長期留隊，但佢要求會方就三方面作出承諾，先至會續約。首先，羅馬必須增設1位高層，幫手處理傳媒施加嘅壓力，以及協調同球證嘅關係。

其次，羅馬明夏需要向車路士買斷前鋒盧卡古，第三，要同另一位前鋒保羅戴巴拿續約至2026年，因為摩連奴認為只有留住呢兩大猛將，球隊先至有本錢爭標及重返歐聯，預料雙方要達成協議，並非易事，特別係盧卡古轉會費及薪酬高昂，球會未必負擔得起。