開季6場4負！曼聯回到費格遜上任前

曼聯不敵拜仁慕尼黑，開季6場4負，有傳媒統計，曼聯對上一次開局成績咁差，要數到1986至87年球季，當時領隊係朗艾堅遜，因為開局太差被炒，繼任者就係傳奇領隊費格遜。

《進球網》將曼聯今季同當年開季成績進行比較，1986至87年球季曼聯首仗輸畀阿仙奴、韋斯咸同查爾頓錄得3連敗，之後和咗李斯特城同擊敗修咸頓，但第6輪輸畀屈福特，開季6場1勝1和4負，當年曼聯頹勢未止，再輸畀愛華頓同車路士，朗艾堅遜最終喺11月初被炒，翌日即由費格遜上任接手，開啟輝煌盛勢。

今季曼聯首仗獲勝，但第2場即輸畀熱刺，之後又險勝諾定咸森林，近3仗接連不敵阿仙奴、白禮頓同拜仁慕尼黑，共5場聯賽同1場歐聯，6場2勝4負，坦哈格成績同當年朗艾堅遜差唔多，當年曼聯喺11月初換帥，搵到費格遜領軍，今季會否歷史重演？