史特加神鋒追平羅拔佬紀錄　各大豪門準備搶人啦

周六(23日)凌晨德甲，史特加主場以3比1擊敗達斯泰特，趁利華古遜、拜仁慕尼黑較遲比賽，暫時坐上榜首之位。史特加前鋒古拉斯今仗梅開二度，開季5場聯賽已入10球，追平前拜仁射手羅拔利雲度夫斯嘅紀錄，成為德甲史上首5場聯賽最多入波球員之一。

開賽17分鐘，史特加中堅薩加度擺烏龍導致球隊落後，但之後成為古拉斯表演時間，佢先助攻安素米洛特射入扳平，跟住自己轉身抽射入世界波，上半場已經協助史特加反超前。戰至下半場補時，古拉斯再巧妙笠射入網，奠定3比1勝局。

現年27歲嘅古拉斯上季以借用身份由雷恩加盟史特加，踢22場德甲入11球，會方今夏以900萬歐元(約7,500萬港元)買斷佢，呢位畿內亞國腳不負托所，今季5場聯賽都有波入，合共轟入10球，追平2020/21年球季手羅拔利雲度夫斯創造嘅紀錄。

以古拉斯嘅超高入球率，好大機會成為今季德甲神射手，屆時勢必引來各大豪門搶人。