奧拿拿打爭氣波　「神救」顯身價

曼聯之前3場賽事合共失10球，門將奧拿拿成為眾矢之的，呢位喀麥隆國腳今仗英超對般尼，終於顯身價，包括撲出對手安杜尼頭槌勁頂，成為紅魔鬼力保不失嘅功臣。

開賽初段，曼聯防線險象環生，10分鐘般尼前鋒安杜尼接應右路傳中，衝前勁頂，奧拿拿反應夠快，飛身將皮球撲出底線。7分鐘之後，安杜尼禁區左路近門起腳，奧拿拿及時出迎封位，皮球中柱彈出。42分鐘奧拿拿再接實阿朗藍斯嘅勁射，紅魔鬼避過3劫，先至有機會打開紀錄。

奧拿拿全場有4次成功撲救，證明自己唔止識傳波，撲救技術一樣精湛，經此一役之後，奧拿拿應該可以重拾信心。