慘過迪基亞 世界盃冠軍成員都「失業」

2023年09月24日 20:11
東網電視
更多新聞短片
艾真度高美斯協助阿根廷捧上年世界盃冠軍。(Getty Images)
西班牙門將迪基亞今夏以自由身離開曼聯後,仍然未有班落,更傳出打算收山,其實現時球壇唔止佢一位星級「孤兒仔」,協助阿根廷捧上年世界盃冠軍嘅中場艾真度高美斯同樣未有球會收留,可能考慮直接掛靴。
現年35歲嘅艾真度高美斯2014至20年效力阿特蘭大期間打出名堂,為呢支意甲球隊上陣252場入59球,2021年1月轉投西維爾。高美斯上年世界盃首輪分組賽以正選上陣,但阿根廷卻大熱倒灶不敵沙特阿拉伯,呢位身高1米67位「矮腳虎」被主帥史卡朗尼打入冷宮,佢踢完世界盃後,因為傷患問題淪為西維爾後備,結果今夏被提早1年解約。
據悉艾真度高美斯曾經打算去阿聯酋搵食,但始終未能獲得滿意合約,所以唔排除退役,佢話:「我好享受喺塞維利亞(西維爾所在城市)嘅生活,正在等待一個合適機會,如果機會冇出現,我會考慮退休,為咗足球,我已經付出一切,唔想最後晚節不保。」