中東資金再出手　今次要買起國米

沙特阿拉伯球會今夏重金簽入多位球星，震驚球壇，中東資金又準備出手，將目標瞄準歐洲大球會，根據意大利《都靈體育報》爆料，有來自阿拉伯地區嘅基金，計劃以13億歐元(約108億港元)收購意甲勁旅國際米蘭。

國際米蘭近年財政一直處於虧損，其中2021/22年球季勁蝕1.4億歐元，加上負債超過3.5億歐元，盛傳球會大股東蘇寧集團有意將國米賣盤，已經委託一間美國銀行搵買家，結果有阿拉伯地區嘅基金願意以13億歐元收購國米，比同市勁敵AC米蘭上年賣盤畀美國財團多1億歐元。

考慮到國米近年成績好過A米，包括打入上屆歐聯決賽，中東基金願意出較高價錢收購「藍黑兵團」絕對合理，國米管理層正在考慮有關報價。

事實上，近十幾年不斷有歐洲球會落入中東人手上，包括阿布扎比投資局2008年收購曼城，卡塔爾體育投資局2011年買巴黎聖日耳門，2年前沙特阿拉伯主權基金收購紐卡素，卡塔爾財團亦正在爭取收購曼聯，所以國際米蘭被中東基金買起，絕對唔出奇。