紐卡素8比0數錫菲聯　「八星報喜」創紀錄

周一(25)凌晨英超上演大屠殺，紐卡素作客8比0狂數新升班嘅錫菲聯，而且「喜鵲」今場8個入波嚟自8個唔同球員，係英超史上首次出現同隊單場「八星報喜」嘅場面，認真犀利！

紐卡素上周中踢完歐聯，不過球隊未見疲態，21分鐘由桑恩朗達夫入波揭開屠殺序幕，丹般恩同保治文上半場各入1球，紐卡素半場領先3比0。換邊後紐卡素愈踢愈有，哥林威爾遜、安東尼哥頓、米基爾阿米朗、般奴古馬雷斯同阿歷山大伊沙克輪流入波，最終紐卡素大勝8比0，創下球會史上英超最大作客勝仗。

8個入波由唔同球員攻入(唔計烏龍波)，亦創下英超紀錄，車路士(2012年)同曼聯(2021年)都試過單場有7個球員入波。紐卡素領隊艾迪侯域賽後表示：「我從來冇懷疑紐卡素嘅進攻能力，球隊有好多出色進攻球員，我哋開季賽程好困難，不過今場球員努力尋找入波，我咃好尊敬錫菲聯，今場只係做好我咃爭取入球嘅本份。」