阿積士球迷騷亂　聯賽腰斬　總監落鑊

荷甲班霸阿積士今季立立亂，開季頭4輪聯賽只得1勝，周日(24日)主場迎戰飛燕諾一仗，上半場阿積士以0比3遙遙落後，主場球迷即爆發騷亂，賽事被逼腰斬。大批球迷喺阿積士主場大肆破壞，要靠防暴警察出動平亂，阿積士隨後宣布將總監米斯連達炒魷。

阿積士今季球場內外是非不斷，總監米斯連達涉嫌喺轉會入面有利益輸送被調查，周六(23日)更爆出佢曾怒闖球員更衣室，向球員表示考慮炒教練史迪恩，令球員非常震驚。今仗阿積士繼續冇起色，37分鐘已連失3球，主場球迷向場內掟煙花令比賽停頓；56分鐘主隊球迷再掟煙花，球證第2度暫停比賽，之後更宣布比賽腰斬。

賽事腰斬後球迷喺場內大肆破壞，防暴警察出動平亂，警方表示事件中拘捕3人，預計喺檢查CCTV後會作出更多拘捕行動。阿積士亦發表聲明，除批評有暴徒乘亂搞破越，亦宣布即時解僱總監米斯連達。綽號「鑽石眼」嘅米斯連達曾喺多蒙特同阿仙奴效力，今年5月出任阿積士總監，但管理方法引起唔少爭議。