麥巴比足踝受傷　鬥紐卡素上陣成疑

巴黎聖日耳門(PSG)喺周一(25日)凌晨法甲大戰，主場以4比0大破馬賽，不過王牌前鋒基利安麥巴比因足踝受傷，踢唔夠半場就退下火線，未知趕唔趕得切下星期歐聯對紐卡素上陣。

開季表現麻麻嘅PSG，今仗主場表現勇猛，8分鐘就靠阿舒拉夫妙射罰球領先，雖然基利安麥巴比喺32分鐘受傷被換走，但PSG火力未有減弱，高路梅安尼37分鐘再下一城。入替麥巴比嘅葡萄牙前鋒干卡路拉莫斯，下半場發威梅開二度，協助PSG大勝4比0完場。

麥巴比返到後備席後，一直由軍醫治療左腳足踝問題，PSG教練安歷基賽後表示：「傷勢唔嚴重，不過佢覺得痛楚，所以換走佢係合適做法，佢會冇事。」PSG會喺周六(30日)對克萊蒙特，下周中就喺歐聯作客紐卡素，麥巴比趕唔趕得切上陣仲係未知數。