阿仙奴爆傷兵潮　賴斯受傷5大主力缺陣

阿仙奴周日(24日)英超兩度領先下被熱刺逼和2比2，而且賠了夫人又折兵，今季加盟後表現出色嘅迪格蘭賴斯，半場因傷提早退下火線，領隊阿迪達亦承認傷患「唔尋常」。阿仙奴目前有5個主力球員受傷，密集賽程有排捱。

阿仙奴對熱刺半場換走迪格蘭賴斯，阿迪達賽後表示：「佢覺得背部有唔妥，上半場嗰陣佢已經提出，半場檢查發現佢唔踢得，所以一定要換人。以迪格蘭賴斯嘅性格，主動提出有唔妥係唔尋常，希望唔會休息好耐，我哋要再檢查睇下。」

喺對熱刺前嘅操練，比利時翼鋒李安度杜沙特亦受傷缺陣，加上湯馬士柏迪、祖利安添巴同加比爾馬天尼利都養緊傷，5位主力球員都唔能夠候命。阿仙奴周四(28日)凌晨會喺英聯盃作客賓福特，周六(30日)再喺英超作客般尼茅夫。