蘭斯達爾為拉耶鼓掌　加歷查恥笑：做戲！

阿仙奴門將之爭近期成為熱話，大衞拉耶同蘭斯達爾2大門將競爭激烈，西班牙國腳大衞拉耶近期佔據上風，連續3場正選上陣，周日(24日)對熱刺嘅北倫敦打吡，坐後備席嘅蘭斯達爾曾為大衞拉耶「神救」鼓掌，但利物浦名宿加歷查就恥笑佢係「戲子佬」，引嚟各界炮轟。

大衞拉耶喺對熱刺一仗，曾飛身救出班倫莊臣嘅近門必入球，睇到坐冷板嘅蘭斯達爾都高舉雙手鼓掌，不過為《天空體育》評述嘅加歷查就話：「我好似睇緊奧斯卡頒獎禮，你知道拎唔到獎嘅人，都會笑晒口咁為得獎者拍手，其實個心就碎晒，睇見都覺得好好笑。」

加歷查呢番言論就得罪唔少人，蘭斯達爾爸爸亦喺社交網反擊：「你真係可恥，唔該畀少少風度出嚟，我個仔就有啦！」阿仙奴領隊阿迪達早前表示，會將門將同場區其餘位置一視同仁，根據戰術需要而輪換門將。