迪比利淪為「006」　冬季或被外借

法甲豪門巴黎聖日耳門(PSG)今夏豪花5,000萬歐元(約4.1億港元)向巴塞隆拿收購翼鋒奧士文尼迪比利，代替美斯嘅位置，但效果欠佳，呢位26歲法國國腳為PSG上陣6次，冇入波亦冇助攻，淪為「006」，盛傳會方計劃明年1月冬季轉會市場重開後，將佢外借去英超。

PSG原本有意借用馬體會前鋒祖奧菲歷斯，但呢位葡萄牙國腳最終加盟巴塞隆拿，並有出色表現，包括射入3球及2次助攻。反觀PSG向巴塞簽入嘅奧士文尼迪比利，卻6戰0入球0助攻，被網民嘲諷眼光太差，亦令迪比利前途亮起紅燈。

英國《鏡報》爆料指「倫敦雙雄」阿仙奴同熱刺都有意喺明年1月向PSG借用奧士文尼迪比利，特別係熱刺失去射手哈利卡尼之後，渴望簽入進攻球員，認為奧士文尼迪比利係合適人選。不過，距離冬季轉會市場重開仍然有一段日子，如果奧士文尼迪比利表現回勇，PSG可能放棄外借計劃。