洛迪停賽3場　加雲菲臘斯趁機博翻身

曼城中場洛迪卡斯簡迪上仗英超對諾定咸森林，向對手基比斯韋特「叉頸」，被球證直接出示紅牌趕出場，由於會方決定放棄上訴，意味呢位西班牙國腳停賽3場本土賽事，包無緣英聯盃對紐卡素、英超對狼隊、阿仙奴，令長坐冷板嘅加雲菲臘斯終於有機會擔正博翻身。

曼城中場人腳備受傷停問題困擾，本身已經有奇雲迪布尼、高華錫、貝拿度施馬，以及可以客串防中嘅史東斯受傷，加上現時洛迪卡斯簡迪停賽3場，令「藍月亮」進一步受打擊，特別係下月初英超作客阿仙奴，缺少洛迪卡斯簡迪，勢必削弱中場攔截力。

綜觀隊內可以填補洛迪位置嘅球員，得番加雲菲臘斯，呢位27歲英格蘭國腳上年7月由列斯聯轉投曼城後，因傷抖多過踢，今夏幾乎被賣走，但佢堅持留隊，並有信心爭奪正選。

加雲菲臘斯今季僅為曼城後備上陣3次，包括上仗對森林下半場51分鐘上陣，頂替洛迪卡斯簡迪被逐後嘅位置，表現唔錯，嚟緊英聯盃對紐卡素，應該可以踢正選。曼城未來3場本土賽事，將成為加雲菲臘斯拯救事業嘅好機會。