拜仁大勝晉級　19歲日本新星首次上陣

周三(27日)凌晨德國盃第1圈賽事，拜仁慕尼黑作客輕鬆以4比0大勝丙組仔普斯辛蒙斯達，晉級第2圈，拜仁19歲日本中場福井太智首次為一隊喺正式賽事上陣，被睇好可以成為另一位香川真司，將來閃耀德甲。

由於對手太弱，拜仁慕尼黑教練杜曹收起射手哈利卡尼，但仍然迅速由祖普莫亭喺開賽9分鐘射入打開紀錄，跟住干拉特賴馬、20歲基迪斯格各入1球，上半場已經領先3球，加上86分鐘，泰爾埋齋贈普斯辛蒙斯達4蛋。

福井太智63分鐘入替甘美治，表現淡定，甚有大將之風，呢位新星今年由日職球隊鳥棲砂岩加盟拜仁，之前主要為二隊比賽，早前德甲榜首大戰對利華古遜，主帥杜曹首次將福井太智加入大軍名單，雖然佢並冇上陣，但可見杜曹有意栽培佢，趁今仗德國盃對手較弱，畀福井太智披甲吸取為一隊上陣嘅經驗，相信將來應該仲會有唔少機會亮相。

不過，拜仁贏波亦付出代價，翼鋒基拿比踢咗11分鐘，受傷退下火線，可能缺陣10月1日凌晨德甲作客RB萊比錫嘅大戰。