安東尼將飛返英國　接受警方問話

曼聯前鋒安東尼馬菲奧斯因為被前女友Gabriela Cavallin控告虐打，已經被曼聯雪藏近1個月，呢位23歲翼鋒近期一直留喺祖國巴西，根據英國《太陽報》爆料，安東尼近日現身聖保羅機場，將先飛去西班牙，然後返回英國曼徹斯特，接受警方問話。

Gabriela聲稱遭到安東尼多次虐打，其中1次發生喺今年1月曼徹斯特一間酒店內，引起英國警方注意。事件曝光後，安東尼身處巴西，曼聯方面要求佢延遲歸隊，一直未同警方接觸。消息人士指，安東尼認為自己清白，無懼配合警方調查：「安東尼好堅定自己冇做錯事，想坐低接受警方問話，佢冇嘢隱瞞，可以交出任何資料畀警方，包括手機內容，佢想盡快解決事件，令足球事業重回正軌。」

安東尼馬菲奧斯自9月初為曼聯上陣對阿仙奴之後，一直缺陣，並被踢出巴西國家隊，當然希望盡快平息事件，否則球員生涯隨時摧毀於一旦。