車仔貴價左閘等冬季走人　或同Kepa再做隊友

車路士近年簽入多位球員，造成人滿之患，其中身價高達5,500萬鎊(約5.2億港元)嘅左後衞古古列拿，被領隊普捷天奴投閒置散，今季僅於英聯盃上陣1次，英國《太陽報》指呢位25歲西班牙國腳已經決定等明年1月冬季轉會市場重開後離隊，皇馬有興趣借用佢。

古古列拿上年夏天由白禮頓轉投車路士後，未能取得正選，其中英超上陣24次，今季聯賽更加未上陣過，只係踢過1場英聯盃對AFC溫布頓，可見古古列拿已經唔屬於普捷天奴計劃之內，離隊成為拯救足球事業嘅唯一方法。

事實上，曼聯曾於今夏提出借用古古列拿，但車路士方面要求700萬鎊借用費，而未能成事，最主要原因係車仔唔想益咗競爭對手。因此，如果古古列拿離隊，相信要焗住去其他聯賽搵食，皇馬今夏向車仔借用門將阿列沙巴拿加(Kepa)，有意借用埋古古列拿，佢亦應該樂意返回祖國西班牙。