巴塞又玩「免簽」　今次睇中英冠兵

西甲勁旅巴塞隆拿近年因為財困，非常積極爭取簽入自由身球員，以節省轉會費支出，根據西班牙《每日體育報》爆料，巴塞隆拿最新睇中英冠球隊李斯特城中場尼迪迪，計劃等呢位26歲尼日利亞國腳明夏約滿後，免轉會費簽入佢。

李斯特城今季降落英冠，有多位主力離隊，包括中場占士麥迪臣轉投熱刺、哈維班尼斯轉投紐卡素，雖然尼迪迪隨隊降班，但拒絕續約，估計佢想等明夏約滿離隊。由於尼迪迪明年1月就可以同其他球會傾加盟事宜，據悉巴塞打算出手斟介佢。

不過有分析指巴塞睇中尼迪迪，並非想重用佢，唔排除免費簽入佢之後，等一年再轉售圖利，情況就好似上年夏天簽入自由身嘅科特迪瓦國腳基斯爾，今夏將佢出售畀沙特球隊吉達艾阿里，獲得1,250萬歐元收入，所以尼迪迪加盟巴塞隆拿之前，真係要三思。