摩連奴搶曼聯人　想借查頓辛祖

曼聯翼鋒查頓辛祖同領隊坦哈格關係破裂，預料呢位23歲英格蘭國腳好大機會明年1月轉會市場重開後離隊，意大利傳媒指羅馬教練摩連奴密切留意辛祖情況，並有意借用佢。

查頓辛祖早前公開反駁坦哈格指佢訓練表現欠佳嘅言論之後，兩人反面，坦哈格要求對方道歉，但辛祖拒絕，結果坦哈格使出「封殺令」，唔止雪藏查頓辛祖，甚至禁止佢出現喺訓練場內任何一隊區域，包括一隊嘅飯堂。

查頓辛祖嘅紅魔鬼生涯已進入倒數，除咗前度球會多蒙特有意回購佢之外，羅馬亦想借用，呢支意甲首都球隊今季成績欠佳，踢5場聯賽只有1勝2和2負，計劃冬季增兵，教練摩連奴一向對曼聯球員情有獨鍾，希望借用辛祖救亡。一般相信曼聯唔會將查頓辛祖出售或者外借去其他英超競爭對手，羅馬的確有機會簽入佢。