宿命難破　夏維斯慘變「009」

阿仙奴喺英聯盃第3圈，憑雷斯尼爾遜開賽8分鐘入波，作客以1比0擊敗賓福特，成功晉級，但中場球星夏維斯繼續冇料到，今季加盟兵工廠以來，各項正式賽事上陣9次，仍然0入球及0助攻，慘變成「009」。

阿仙奴主帥阿迪達今仗派出多位副選上陣，夏維斯仍有份擔正，原本以為呢24歲德國國腳可以趁機開齋，但佢踢足90分鐘都係冇建樹，兵工廠唯一入波，由尼基迪亞傳畀雷斯尼爾遜射入。

值得一提，雷斯尼爾遜今季僅為阿仙奴披甲4次，其中3次仲係後備上陣，都可以入到1球，反而夏維斯踢9場大部份時間擔任正選，始終0入球及0助攻，下仗對般尼茅夫，好可能由「009」變「0010」，達到雙位數。

不過，根據「轉會權威」記者羅曼諾(Fabrizio Romano)爆料，阿仙奴上下仍然非常支持及信任夏維斯，意味未來賽事佢仍然會獲得重用。