美斯缺陣打回原形　國際邁亞密失落冠軍

周四(28日)朝早美聯盃決賽，國際邁亞密喺阿根廷球王美斯缺陣下，以1比2不敵侯斯頓戴拿模失落冠軍。

美斯今個夏天加盟後，國際邁亞密由魚腩變成勁旅，先贏北美聯賽盃冠軍，再殺入美聯盃決賽，不過今仗鬥侯斯頓戴拿模，傷患未愈嘅美斯只能夠便服出席觀戰，同碧咸、施丹及NBA球星占士夏登等齊齊喺觀眾席睇波，加上西班牙球星佐迪艾巴亦受傷，令國際邁亞密打回原形。

國際邁亞密缺少美斯下，進攻組織唔到有威脅攻勢，更因後防甩漏喺上半場連失2球，換邊後雖然奮力進攻，但要到補時階段先靠祖斯夫馬天尼斯破蛋，可惜為時已晚，侯斯頓戴拿模贏2比1捧盃。

國際邁亞密下個目標係美職季後賽，但佢哋依家排東岸尾2，落後第9名嘅紐約城5分但踢少2場，仍然有機爭奪季後賽附加賽資格，不過前提係要美斯盡快復出，否則國際邁亞密凶多吉少。