C朗轟入絕殺球　創下三大里程碑

周五(29日)晚沙特阿拉伯聯賽，艾納斯憑C朗87分鐘射入12碼，作客以2比1擊敗艾爾泰，直逼榜首希拉爾。巨星C朗愈戰愈勇，佢今季聯賽已入10球及5次助攻，兩項數據都排第1位，極之霸氣。

開賽32分鐘，C朗妙傳畀塔利斯卡射入打開紀錄，呢位38歲葡萄牙國腳下半場幾乎自己入1球，但射門中柱彈出。戰至79分鐘，艾納斯被對手扳平，面臨失分危機，C朗又扮演救世主，87分鐘主射12碼入網，協助艾納斯各項賽事取得9連勝，目前僅落後榜首希拉爾2分，加入爭標行列。

值得一提，C朗今場射入12碼之後，累積為艾納斯上陣34場入30球，近6場聯賽創造15球，包括射入10球及5次助攻，領先射手榜及助攻榜。此外，C朗2018年離開皇馬後，曾經被指高峰已過，但原來佢喺「後皇馬時代」已經累計入200球，證明自己寶刀未老。