尼馬12碼都唔入　繼續食白果

周六(30日)凌晨沙特阿拉伯聯賽，希拉爾球星尼馬獲得隊友「讓射」12碼，但呢位巴西國腳卻宴客，簡真係大嘥鬼，幸好希拉爾主場仍然以2比0擊敗艾沙比，並趁伊蒂哈德和波失分，升上榜首。

希拉爾上半場37分鐘獲得12碼，原本首席「劊子手」艾達沙尼讓畀尼馬主射，希望幫呢位31歲前鋒開齋，但尼馬起腳卻被艾沙比嘅南韓門將金承奎撲到再中柱彈出，錯失入球黃金機會。

換邊之後，尼馬知恥近乎勇，為球隊創造2個入波，先係開出角球畀中堅高列巴尼頂入，跟住策劃攻勢，妙傳畀阿歷山大米祖域射門，雖然被門將金承奎撲出，但米祖域自己補射入網，取得個人今季聯賽第6個入波，僅次於入10球嘅C朗。

比賽末段，尼馬曾經近門起腳，但卻唔中目標，為希拉爾上陣4次仍然食白果。