摩連奴帥位危　干地隨時接手執教羅馬

意甲球隊羅馬今季成績欠佳，6場聯賽僅有1勝2和3負，包括上仗以1比4大敗於熱拿亞腳下，教練摩連奴帥位開始受動搖，意大利傳媒指，如果羅馬表現再冇改善，可能季中換帥，干地成為頭號新帥目標人物。

摩連奴一向有「摩三季魔咒」宿命，以往教一支球隊，未試過長過3季，今季正係佢成為羅馬教練第3季，加上成績差，令人懷疑佢將於季中執包袱。

意大利傳媒《Tuttomercatoweb》指羅馬已經有新帥人選，就係干地，事實上早於4年前，羅馬已經有意聘請干地領軍，佢最終卻加盟國際米蘭，呢位54歲意大利名帥今年3月離開熱刺之後，仍然未有着落，如果羅馬再次邀請佢執教，或者有機會成事。

值得一提，摩連奴同干地都曾經教過國際米蘭、車路士、熱刺，而且同樣率領國米、車仔捧聯賽冠軍，但擔任熱刺主帥失敗收場，2人似乎屬於「命運共同體」，干地下一步的確可能接替「寸王」執教羅馬。