海倫烏龍助攻　水晶宮射爆曼聯

周六晚(30日)英超賽事，曼聯又失分，主場0比1不敵水晶宮，開季英超7戰4負，新簽前鋒海倫不但入唔到波，仲送出「烏龍助攻」，整體進攻能力之差令人搖頭。

「紅魔鬼」聯賽險勝般尼，再於英聯盃大勝水晶宮3比0，以為有起色，點知只係虛火，水晶宮今仗回復強陣，伊比爾治伊斯、佐基姆安達臣等復任正選，全隊硬淨番晒，曼聯派出美臣蒙特任中場，海倫同法根度柏利斯查進攻，反而冇乜嘢睇。

曼聯開賽最具威脅攻門係12分鐘，海倫接應拉舒福特傳送單刀埋門，挑過出迎門將森莊士東，但白界線前被對方回防嘅泰歷米素爾解圍。

水晶宮並非全程捱打，靠長傳反擊搵機會，25分鐘一次死球機會，回防嘅海倫頭槌解圍對方傳中球但頂唔應，被對方佐基姆安達臣遠柱第一時間窩利抽射死角入網，水晶宮領先1比0。

下半場曼聯奮起反攻，56分鐘般奴費南迪斯中距離勁射，但被森莊士東飛身撲出，之後蘇夫恩岩拉伯特一次射門中楣，而且犯規在先無功而還，最終曼聯輸0比1。