熱刺攞完着數踩多腳　羅美路：返屋企喊啦！

熱刺今季喺新帥普斯迪高路執教下，開季成績非常突出，7輪賽事拎到5勝2和，同阿仙奴成為今季僅餘兩支不敗之師。熱刺周日(1日)喺VAR犯錯下擊敗利物浦，不過佢哋攞完着數都唔面紅，阿根廷中堅基斯甸羅美路賽後更同同鄉阿歷斯麥亞里士打網上駁火，叫該利物浦中場：「返屋企喊啦！」

熱刺贏波後升上聯賽第2位，基斯甸羅美路賽後喺社交網貼文：「呢支球隊有頂級士氣、頂級雄心，熱刺上下永遠團結一致。」作為阿根廷國家隊隊友嘅利物浦中場阿歷斯麥亞里士打，就好唔客氣踩場留言：「當你踢緊12個人就好正常。」諷刺熱刺獲得球證偏幫而贏波。

面對阿歷斯麥亞里士打挑機，基斯甸羅美路亦唔輸蝕回應：「返屋企喊啦！」至於熱刺領隊普斯迪高路賽後就表示：「我哋明白比賽係會有錯誤，包括球證，大家都誤以為VAR係零犯錯，好多規則都需要球證演繹，而人類就係會犯錯，呢個係足球比賽一部份。」