高級組銀牌　兩邊都見「紅」 深水埗淘汰港會

「高級組銀牌賽」周日（1日）於深水埗運動場進行第一圈賽事，深水埗繼上月中聯賽後再鬥港會。結果憑柏羅邦攻入全場唯一入球，有主教練鄧冠研紅牌被逐的深水埗，以1比0擊敗比賽後段踢少1人的港會，晉級8強，兼取得今季首場勝仗。

深水埗改由李溢晉今季首次擔正把守大關，浦敏復任正選與拿亞鎮守後防，小池晃廣與顏卓彬坐鎮中場，支援今場改踢箭頭的尼高拉斯；港會正選僅作出一個調動，麥美倫重返正選大軍擔正，上場一錘定音的莊文歷，與江展民負責兩翼側擊，為箭頭里奧輸送彈藥。

深水埗今場控球優勢較為明顯，2分鐘，柏羅邦禁區外遠射，威脅不到港會門將費查。15分鐘梁星耀罰球半場半射，又被費查托出底線。雙方其後一度陷入膠着，但努力尋找機會深水埗，40分鐘收到回報，柏羅邦禁區內窄角度起腳，費查拍到都入，完半場前為深水埗取得領先優勢。

換邊後，港會壓前全力反撲，搶回不少攻勢，56分鐘，劉學銘接應角球頭槌頂斜。60分，加斯特夫禁區外起腳遠射，被李溢晉接實。港會及後派出福保羅、泰亞高及簡嘉亨，企圖加強攻勢。82分鐘，簡嘉亨快速推進起腳，被李溢晉撲出。

比賽後段，泰亞高禁區內拳擊拿亞，被球證直接出示紅牌驅逐，同樣領紅的還包括深水埗主教練鄧冠研。結果港會無力回天，深水埗將1比0勝局保持到完場。晉級的深水埗，將與標準流浪爭入4強。

深水埗順利贏波晉級，主教練鄧冠研賽後大讚球員表現：「球員好努力，做出賽前部署，場上好有活力，用個波比之前有進步，同埋充滿信心，贏波係佢哋功勞。」不過「鄧Sir」於比賽尾段突然領紅被逐，對此他亦大嘆無奈：「當時有個波喺我哋後備席碌咗出球場，然後球證就叫我交一個人出嚟，唔係就要我食（紅牌）。但其實我今日唔係場監，唔知點解係我食，所以有啲奇怪。如果你睇到邊到扔，咁你咪捉個位球員，無理由睇唔到，又要捉個人出嚟。」

港會1球僅負深水埗出局，賽後主教練東尼咸美頓（Tony）承認球隊在上半場表現未如理想，尤其錯失了多次入球機會。除此之外，Tony又對球證在比賽尾段處理紅牌一事的手法有所微言：「當出示咗紅牌，就算你有冇錯都要服從，但對方教練仲一直企喺球場，浪費6分鐘去拖延時間，球證應該要做好啲。」